हिरासत भित्रै थुनुवाले गरे आत्महत्या

सर्लाही, चैत्र ३० - हरिवन इलाका प्रहरी कार्यालयको हिरासतमा रहेका एक थुनुवा शुक्रवार बिहान पासो लगाई मृत अबस्थामा फेला परेका छन् ।

जवर्जस्ती करणी उद्योगमा बिहिवार साँझ पक्राउ परेका ढुंग्रेखोला गाविस-२ का ४७ वर्षीय जितबहादुर घिसिङले बिहान करिब ४ बजे हिरासत भित्रै आत्महत्या गरेको प्रहरीले जनाएको छ ।

हिरासत कोठमा सुत्न दिएको तन्दा च्यातेर पासो बनाई झ्यालको डन्डीमा बाँधेर झुण्डीएको अबस्थामा बिहान ४ बजे प्रहरीे लाश फेला पारेको थियो ।

घिसिङले झ्यालमा रहेको फलामको डन्डीमा डोरी बाँधेर पासो लगाएका थिए । उनको खुट्टा भुईं भन्दा २ इन्चजति माथी लत्रिएको थियो । हिरासत कोठामा उनी एक्लै थिए ।

हरिवनका प्रहरी निरीक्षक दिपक न्यौपानेले बत्ति जानु अघि राती ३ बजे सम्म घिसिङ सुतिरहेको र लाईन गएपछि आत्महत्या गरेको हुन सक्ने वताए । थुनुवा कोठामा बलेको बत्ति लाइन गएपछि निभेको मौका छोपेर घिसिङले आत्महत्या गरेको प्रहरीको भनाई छ ।

आफ्नै भान्जिलाई बुधवार जवर्जस्ती गर्न खोजेका घिसिङलाई बिहिवार स्थानीय महिला र आफन्तले पक्रेर प्रहरीमा बुझाएका थिए । पक्राउ पछि कुटपिट गरेर प्रहरीलाई बुझाइएका घिसिङले लाजका कारण आत्महत्या गरेको हुन सक्ने उनका नातेदारको भनाई छ ।

घिसिङका भिनाजु बुद्धिमान गोलेले भान्जीलाई जवर्जस्ती गर्न खोज्दा समाजले नै समातेर प्रहरीमा बुझाएकाले गाउँमा अनुहार देखाउन नसकेर आत्महत्या गरेको हुन सक्ने वताए । 'मलाई कसैमाथी शंका छैन,' उनले भने, 'पहिलेदेखि चरित्र ठिक थिएन, प्रहरीले ल्याएपछि मुख देखाउन नसक्ने भएर आत्महत्या गरेको जस्तो लाग्छ ।'