समाचार

एमाओवादीमाथि विश्वास छैनः नेपाल
=====================

२५ फागुन, चितवन । नेकपा एमालेका वरिष्ठ नेता माधवकुमार नेपालले प्रधानन्यायाधीशलाई राजीनामा नगराई कार्यकारी प्रमुखको जिम्मेवारी दिन नहुने बताउनुभएको छ ।
देशमा सङ्कटकालीन अवस्था आएमा गम्भीर खतरा निम्तिन सक्ने भएकाले पहिले राजीनामा गराएर मात्रै प्रधानन्यायाधीशलाई नेतृत्व दिनु बुद्धिमानी हुने उहाँको भनाइ थियो ।
चितवनमा भएको पत्रकार भेटघाट कार्यक्रममा नेता नेपालले एमाओवादीको षडयन्त्रप्रति दलहरु सचेत हुनुपर्नेमा जोड दिनुभयो । विगतका उदाहरण हेर्दा एमाओवादीले दलका नेताहरुलाई घुमाइरहेको प्रस्ट भएको भन्दै उहाँले भन्नुभयो- “कुनै कुरा अहिलेसम्म एमाओवादीले सत्य बोलेको छैन, अब पनि विश्वासिलो आधार छैन ।”
अहिले दलहरुको आजभोलि नै सहमति हुन्छ भन्ने अभिव्यक्तिमा आफ्नो विश्वास नरहेको भन्दै उहाँले यति छिट्टै सहमति होला भन्ने आफूलाई विश्वास नलागेको बताउनुभयो ।
कांग्रेस नेता शशाङ्क कोइरालाले राजनीतिक इच्छाशक्ति भए समयमै निर्वाचन हुने बताउँदै एमाओवादीले अहिले खेलवाड गरिरहेको भान भएको दाबी गर्नुभयो । रासस